دوشة

الناس في سواقي الدنيا تدور
وتتهوه من دوشة عتمة لدوشة نور

و أنا أتوه شوية و شوية أقف
أتفرج عاللي عليه الدور

توهان غريب حط على الكل
واللي يفوق يبقى ميت فل

بس للتايهين يصبح غريب
لا حد يسأل عليه و لا حد يطُل

والغريب مع الغريب يكوِّنوا شلة
شلة الغرباء في الزحمة هم قِلة

ناس زي الخلق, في الشبه واحد
لكن قلوبهم واخدة من الجنة ضِلّة

وأقف كتير أتفرج, واسأل كل ده ليه
ناس تايهة و ناس نايمة و ناس بتهري في ايه

و ناس تنهي حياة ناس على حديد ولّا نحاس
ولّا ورق قال اسمه فلوس, وعملوا من القلب مداس

وناس شايفة و ناس مش شايفة 
وناس شوية تتوه و تفوقلها شوية

وناس تقف جنبي تبص, شوية وتعدّي
وناس تانية تزحف و ناس تجري في حياتها ماتهدّي

وناس تسأل مين اللي مات؟
مين اللي عايش ومين اللي حيّ؟
اللي فوق ولّا اللي تحت؟ الحراك ولّا السُبات؟

طب ايه الحق و فين الضي؟
في الحيّ ولّا اللي جيّ؟
ولّا اللي راح ومالوش زيّ..  
--

 وأسيب الدنيا تدور
ما الكل هييجي عليه الدور
و العتمة هتصرخ من فين النور
والظلم هيعوي من حق يثور
والشاهد يندم على كل الزور
والأرض هتنفض كل البور
والجنة هتبهى بريان وقصور
والبدر هيصبح يلاقي بدور
في يوم .. في يوم ضيه هيبقى "العدل" هيبقى "الحق" هيبقى "النور"