نزلت أشكي أحكي أتكلم
و في السكة قلت أعدّي و أسلم
قلت كبيري هسكت هبَلِّم!
أصل الواحد ما باقاش فيه حيل يتألم
دخلت دخلة, ضحكت ضحكة, و قلبي حالف ما يفتح له سكة
يا وشي اضحك, يا بقى سلم, شمال يمين بدأ يتكلم
و عدّيت, و لسة قلبي مقبوض
و هدّيت, يا ما في الطريق سدود
لحد ما شفت اللي ما شفته في سنة
من غير كلام سمعته أنا
حسيته هنا
و بكى قلبي من القسى
بكاني على حلم اتنسى
:و لقيتني بطلع ورقة و بكتب
كارت اتحرق, حلم اتسرق, و الإسم بيه على الورق"
كدبوا عليّ, لفّولي هدية, فتحتها, لقيتني الضحية
في لعبة سخيفة, غمّوا عينية, قالوا لي افتحها بعد شوية
عدّت دقيقة ورا دقيقة, لكن محدش نده عليا
فتحت عيني, لقيتني وحدي وسط الناس متغمية
"بصيت أدور, لقيت الحقيقة قاعدة بعيد مستخبية
حرب سنة وراها سنة بدفع تمنها وحدي هنا
يا ناس يا عالم يا هو ده أنا
جاي و بايع الدُنى, و رامي ورا ضهري الألسنة, شاري المرارة بالهنا
يا ناس إتــــقـــــوا ربــــنــــا
ده أنا بازرع معاكوا هنا, تاكلوا التمر و آكل الحصى
ابني الصغير, بقى في يوم أمير, سبته آمانه من بعدي هنا
جِه الوزير, سرق الأمير, حطه أسير, و قال لأ ده تاجي أنا
سنة ورا سنة, كِبِر الأمير و هو أسير
نِسي الأمير إنه أمير
سنة ورا سنة, طغى الوزير حل الحرير
نِسِي الوزير إنه وزير
و معاهم حلمي إتنسى
ظلمني اللي جابني هنا ... ظلمني و باعني و قسى
حلمي مات ... حلمي اتنسى
!حلمي بقى "ذكرى" كويسة
...
No comments:
Post a Comment